Mague ramțhen Yisagyo luhnak ah ralkap bur motor thawn fehmi cu bomb thawn an do ih ralkap 10 lenglo an thih thu September 18 ah Yisagyo PDF in thuthannak an nei.
“September 17 zaan nazi 9:45 hrawngah Yisagyo khawpi luhnak ah bike le motor 2 thawn kilhimnak lam țuanvo neitu ralkap bur fehmi cu PDF Yisagyo in bomb pahnih thawn an do ih ralkap 10 lenglo an thi, hriamhma ngahtu an tam” tiah People Defense Force Yesagyo in thuthannak an nei.
Bomb puakter a si hnuah ralkap pawl cun hriamhreipi vei 6 le meithal vei 100 lenglo kiangkap ah an kap ciamco tiah Yisagyo PDF sungtel pakhat in a sim.
Asina’n PDF lam hriamhma ngahtu an um lo thu le ralkap 10 lenglo an thih thu cu thilthlen dan zohtu pawlin an nemhnget thu a sim bet.
September 8 zaanlam khalah Yisagyo peng Santit khua kiangah ah Pakokko lam ihsin motor thawn ra fehtu ralkap bur cu Yisagyo PDF in bomb thawn an rak do ih ralkap 3 an thi tiah theih a si.
