Mague ramțhen Yaw ram ah zarhkhat sung doawknak țum 3 a um ih ralkap 50 hrawng an thi ih YDF sungtel pakhat a thi ve tiah theih a si.
November 19, 23, 25 ah doawknak țum 3 a um ih November 19 doawknak ah ralkap 40 hrawng le November 23 doawknak ah ralkap 10 hrawng an thi tiah YDF (Saw & Kyaukhtu) cun simnak an nei.
November 19 ah YDF (Saw & Kyaukhtu), CDF (Mindat), CDF (Kanpetlet), PDF (Saw) țangkop in ralkap pawl thawn Țawmah le Cinling khua kiangah nasazet in an kap aw.
Hi doawknak ah PDF (Saw) ihsin mi pakhat a thi ih mi pakhat hriamhma a ngah. Doawknak ah ralkap lam cun helicopter thawn an kap ciamco tiah theih a si.
November 23 ah YDF (Saw & Kyaukhtu), CDF (Kanpetlet) le ralkap pawl cu Letmon tlunta le hnuaita khua karlak zaanlam suimilam 1:30 ihsin doawknak an thok.
Doawknak cu suimilam 2 hrawng a rei ih doawknak ah ralkap 10 hrawng an thi ih YDF (Saw & Kyaukhtu) lam ihsin mi 2 hriamhma an ngah.
November 25 khalah Kanchawng khua kiangih hmunkhuartu ralkap 59 cu Kyaukhtu airport lam ih dung a sip caan Kyaukpung kiangah YDF (Saw & Kyaukhtu) cun bomb tumpi thawn an do thu YDF cun an tarlang
