Bago ramțhen Phyo peng sung Yangon – Mandalay lamzinpi peng țhuam 110 kiangih Sițithațhawng (စေတီတစ်ထောင်) palik zung cu November 9 zinglam nazi 3:30 ah zo timi theih lo hriamkai in an kap ih palik 5 an thi, meithal 2 an laksak ngah tiah theih a si.
“Netabik thuhla kan theih vek asile mi 4 cu an thi cih ih hriamhma ngahtu mi pakhat an thi bet, an zaten minung 5 an thi, hriamhrei khal an laksak ngah, thilthlen dan hi atu kan zingzoi rero, a kiangkap khua pawl ah hriamhrei kai pawl an relh si ko ding” tiah highway police pakhat in a sim.
Phyo PDF thuthang ahcun November 9 zinglam nazi 3:15 ah highway ih Sițithațhawng (စေတီတစ်ထောင်) palik zung cu kah a siih meithal saupi pahnih ngah a si thu, palik 4 an thih thu, PDF sungtel pakhat hriamhma a ngah thu an sim.
