Yangon ramțhen Hlaingthayar peng Bazinhnawng lilawn ah August 22 zinglam suimilam 8:00 hrawngah Hlaingthayar lam ihsin motor pakhat thawn zo timi theih lo cun palik umnak a kap ih palik 1 a thi, pakhat hriamhma a ngah tiah theih a si.
Meithal kah lai hmutu mi pakhat in “khatlam khatlam kahawknak um loin rinlopi in kahawk a si, motor pakhat feh phah cingin a kap, palik pawl an tlu ih a ra kaptu motor khal zamrangten a tlan, malte rei hnuah meithal puak thawmvang kan theisal” tiah simnak a nei.
Hi lilawn ih umtu cu ralkap council ih tatzin pakhat an si tikah kahawknak a thlen hnu reilote ah tatzin ihsin palik tampi an ra thleng ih lamzin phit tahratin meithal thawi an kahngahmi cu ambulance thawn an phur ih lilawn ah mi sukso an cek tiah theih a si.
Hi thilthlen hnu ihsin Yangon ramțhen Insein Cunghkung, Hledan, Cihmindaing peng lamzin hrekkhat pawl cu nasazet ih an cek ih ahleice ih Taxi hi an cek nasa hleice tiah Taxi mawngtu mi pakhat in a sim.
