Yangon ramțhen Bothathawng peng Theinphyu – Bochuk lamzin ih traffic police gate kangmi cu November 30 ah ralkap le palik pawlin zohfelnak an neih thu tualsungmi pawlin an sim.
“Traffic police gate kangmi kan hmu, ralkap le palik khal kan hmu, meikangmi a ra zoh ih an tlung sal” tiah tualsungmi pakhat in a sim.
Cuvek thotho in Yangon ramțhen S. Okkalapa peng veng 4-nak Parami (ပါရမီ) lamzin ih ralkap neihmi U Paing company ih neihmi YBS 14 pakhat cu November 29 zaan suimilam 6:30 ah bomb a puak tiah theih a si.
S. Okkalapa ihsin Alone Thakhinmya (သခင်မြ) pangpar hmuan fehtu YBS 14 ih motor number 1P/9915 cu sukso cawl dingin Parami (ပါရမီ) motor retnak sung a luh zawngah motor țumnak sangka vorhlam tokham hmaiah bomb a puak ih motor ah zohman an um lo ih motor hmailam thlalang pawl a siat thu TRN cun a tarlang.
“Mizaan parami line motor ah bomb a puak tiah kan thei, bomb puak hi a ring lo, minung khal siatsuah aw an um lo tiah kan thei, ralkap le palik pawl an rat khal kan hmu” tiah parami motor cawlhnak kiangih um mi pakhat in a sim.
Ralkap neihmi parami motor le Omini Focus motor pawl cu to lo dingah le ralkap suahmi thilri hmang lo dingah dothlennak tuahtu tlawngta le mino pawlin mipi pawl cu kan dung baite ah theihternak ca an rak suah.
