Yangon ramțhen Hlaingthayar peng ah bike le tungbing totu cu kaihngah an si ahcun tangka ting 5 kuan ding a si tiah ukawknak lam cun ralrinnak an pek thu tualsungmi pawlin an sim.
“Ukawknak hotu a au vivo, atu bike nan to ih kan lo kaihngah asile ting 5 tiah an au, a fiang zetmi pakhat cu an kaihngah ahcun bike cu ngahsal a theih lo ding tiah ka ruat, in cekmi kan hmu ih kan kirsal khalle mi an kap, tuizing hmun 6 hrawngah an um, bike a si ahcun tlansan a olte, curuangah bike rori an kai” tiah Hlaingthayar ih um mi pakhat in a sim.
Atu vekin bike le tungbing zaten an kaih ruangah bike thawn hnațuantu Hlaingthayar mipi pawl cu nuntu khawsaknak, harhdamnak, hnațuannak lam a zaten harsatnak an ton thu tualsungmi pawlin an sim.
“Tualsung minung kan harsa rori si ko, harhdamnak thuhla ah siseh, hnațuannak thuhla ah siseh ziangkim ahhin bike le tungbing hmangin kan remcang thluh, cetzung pawl khal bike thawn feh a theih thluh, motor a si ahcun a hngaknak hmun lawng a thleng, hiti cun ziangtin kan tuah ding, kan zaten kan harsa thluh thlang, motor to ding cun motor hngaknak hmun hi suimilam hrek tluk ke ih feh țul an um, cumi cu bike thawn cun hmakhatte a si, atu cu a harsatuk zo” tiah tualsungmi pakhat khalin a sim ve.
Hivek ruangah nuntu khawsaknak hrangah bike hmang lo thei lo pawl cu an ceknak pawl hrialin hna an țuan rero tiah theih a si.
Hlaingthayar peng cu October 23 ihsin lamzinpi tluan le lamzin tonawknak pawl ah ralkap le palik kom aw in bike pawl an kai ringring tiah theih a si.
