Rangon khawpi bomb puak ah mipi lam ihsin mi pakhat thi, mi pakhat kut bul, Kawl ralkap ṭhenkhat khal hriamtuar le mithi an um zum a si.
Tuisun, June 18 simlam nazi 3:20 hrawngah khan Rangon khawpi တာမွေမြို့နယ် hmun 2 ah bom nasa zetin a puak ciamco, hi bomb puak ruangah tualsungmi pakhat a thi ih pakhat a kut a bul, kawl ralkap ṭhenkhat khal mithi an um men thei tiah an zum thu vengsungmi pakhat cun a sim.
“Lamzin 147 USDP party zung kiangih dingmi Ralkap pawl parah bomb a puak, Kawl ralkap pawl mawṭaw ah hin vei hnih a puak. Ralkap mawṭaw hi a kang alh vutvo. A sungih to Ralkap pawl khal thiamhma tuar an um tiin an sim, an thih le nun cu thufiang kan thei lo. Cun lamzin 155 khalah Taxi parah Bomb puak, mi pakhat a ril, a thih zo a si ko ding, cun kut bul pakhat khal kan hmu, tiin တာမွေ vengsungmi pakhat cun a sim.
Lamzin ih veivak mipakhat cun “Bomb puak hi a ring nasa, hmun hla deuh ihsi hman in ka mawṭaw a hnin ut-i thei. Ka hi naih vivo cu USDP party zung kiang a rak si. Ralkap mawṭaw a kang vutvo ka hmu, a hnuai ih um palik pahnih le ralkap pahnih cu ziangti khal theilo in an um ciau ciau, Ralkap pakhat a bawngbi sau hnuai lam a hlo thluh. Ka zoh dan ah an mawṭaw par rori ah bomb a puak a si hmang. USDP party sung ih bomb maw silole, hi kiangkap ih an retmi bomb lehlam a si hmang ding, a rapthlak nasa tiin mithmutu pakhat cun a sim.
Ralkap lam hi hriamhma tuar an um lawng siloin mithi khal an um tiin mithmutu vengsungmi ṭhenkhat cun an sim. Asinan ziangzat cekci an thi timi cu thufiang theih a si lo. – Chin Net youtube ih tisuahmi Ca in siar duhtu hrang kan post mi a si.
– Chin Net