Yangon ramțhen erea 7 sungah PDF sungtel mi 43 le thapetu mi 8 kan kaingah tiah November 18 ah ralkap council thuthangca pawl ihsin tlangthannak an nei.
Yangon ramțhen Dagon peng saklam, thlanglam, nitlaknak le sikkan lam hmunram ihsin mi 5, Okkalapa peng thlanglam saklam, Bahan, Thingkanchun, Tabwe, Mingalar Taungnyunt peng ihsin mi 9, Hlaing, Hledan, Sanchawng, Kamayuat, Cihmindaing peng ihsin mi 14, Alone, Pasuntawng, Lanmahdaw, kyautthada, Latha peng ihsin mi 4, Thakitah, Thanlin, Dawbon peng ihsin mi 7, Twintți, Kawhhmu, Kunchiangone peng ihsin mi 1, Insein, Hlaingthayar, Shwepyithar, Htantapin peng ihsin mi 3, an zaten mi 43 kan kai tiah an tarlang. Mi pakhat cu thi ko kan kanak ihsin kan kaingah tiah an sim.
Cuihleiah PDF thape ih bawmtu mi 8 khal ralkap council in an kaih thu an tarlang. Bakaya Traffic kilhimtu kaptu pawl le Htantapin palik zing kaptu hleiah Thanlin lilawn, N. Okkalapa lilawn kilhimtu kaptu PDF hrekkhat pawl khal kaihngah an si tiah ralkap council cun thuthannak an nei. Ralkap council thuthangca ih tarlangmi pawl thuhla ah kaih tongtu pawl lam ihsin zianghman thuhla relsuakmi a um hrih lo.
Ralkap pawl cun do an tonnak kiangkap ih an hmuhmi mino pawl an kai țheu ih cuihnuah ralkap council Media ihsin zuk pawl thawn thu dik lo rori cu an tarlang theu.
