Yangon ramțhen Sanchawng peng Bakayachouh ih Traffic police umnak hmun cu October 23 zaanlam suimilam 2:36 ah zo timi theih lo hriamkai hrekkhat in an kap ih ralkap council hriamkai mi pakhat a thi, mi pakhat hriamhma an ngah tiah theih a si.
“Palik motor le ralkap motor pawl awnring tuah in Bakayachouh lam ah an feh, atu lamzin an phit thluh” tiah Sanchawng ih um mi pakhat in simnak a nei.
Atu hi mino le mipi pawl Bakayachouh lam le Sanchawng lam ah zohman feh lo dingin tualsung mino pawlkom cun ralrinnak ca an suah.
Cuvek thotho in Yangon khawpi ACPLE pawlkom cun October 23 sundir suimilam 12:15 ah S. Dagon peng veng 20-nak Juphyu lamzin le Mawngmakan lamzin tonawknak S. Dagon Irraward palik zung kiangah palik pawl cu bomb thawn an do ih palik pakhat hriamhma nasazet a ngah tiah theih a si.
Cuvek thotho in Mon ramkulh Kyaikhto khawpi electric zung cu October 23 zinglam suimilam 5:00 hrawngah bomb a puak ih cui bomb puak cu Kyaikhto Revolution Force (KRA) ih ralrin peknak a si thu KRA cun thuthannak an nei.
