Football hmanga ram leh ram in elna World Cup chu Qatar ah khelh mek a ni a, Thawhlehni liam ta mai khan Iran team chu US lakah 1 – 0 in an tlawm a, an tla a ni.
Iran hi FIFA World Cup a an tel ve na ah hian a ram chhung mi leh sa te ngei pawn an pawmpui lem lo. Ram chhung ah in epna nasa tak a awm vangin mipui te an lungawi lo nasa in hmanni a Kurdish hmeichhe pakhat sawisak hlum a, a thihna chungchang avangin kawng an zawh mup mup bawk.
US laka World Cup a an ram a tlawm hnu hian kum 28 a upa Iran pa Mehran Samak chuan lawmna hun alo hmang a, social media ah te an ram tlak a lawm zia a lo tarlang a ni.
Hetia America laka an ram chak loh an lawm hnu lawk ah hian a chungah vanduaina a thleng a, security forces in Tehran ah an kaphlum tih an puang. Samak hi a lu ah tak kah a nih thu human rights activists ten an sawi.
September thla a Kurdish hmeichhia kum 22 a upa thihna ah Iran mipui te lungawi lovin kawngzawh in an pungkhawm tawh a, IHR in a tarlan danin Qatar a an Football team tirhchhuah pawh hi mipui tam zawk chuan an thlawp lo hul hual a, player te ngei pawn duh lovin England nen an intum hma pawn an hnam hla an sa duh lo an ti.
US laka an chak loh pawh hian mipui tam tak te chu lawm avangin thawm an chhuah a, khawlai ah an car horn an ti ri chuah chuah. Tarlan danin protest neih atangin Iran security force hian alo berah mi 448 an that tawh a. Kum tlinglo naupang 60 vel leh hmeichhia 30 dawn in nunna chan zingah an tel a ni.
