Stage a Comedian, Chris Rock a ben atang a chawlhkar hnih a liam hnu in Will Smith hremna chu tihchian a ni a, Academy of Motion Pictures Arts & Sciences chuan kum 10 chhung atan Oscar a tel thei lo turin a hrem.
Academy te hian an thuchhuah siam ah hian Will Smith hi Oscar mai bakah Academy event hrang hrang buatsaih ah a tel ve thei tawh dawn lo ani.
Board of Governors ten meeting nei a Vote thlak in Will Smith hrem tura thutlukna hi siam a nih thu an puang a, Will Smith chetdan chu pawm theih loh hul hual leh thil pawi tak ani tiin Academy President leh CEO chuan “Academy’s Board of Governors thutlukna angin Mr. Smith hi April 8, 2022 atang in kum 10 chhung Academy events leh programs ah a tel ve phalsak a ni tawh lo” tiin an puang.
Chris Rock hnen ah Academy chuan khawvel hmuh a zahthlak taka Smith an a ben khan engmah chi ai leh buaina neilo a a tih tur ang te tha taka a hlenchhuah vek theih vangin an fak hle bawk ani.
Academy ten a laka hremna an tihchhuah rual hian Will Smith chuan a pawm thu a puang ve nghal a. April 1 khan Smith hian Academy atang in a chhuah thu alo puang tawh a, Chris Rock, Oscars producers, nominees leh Award Show en tu te chungah ngaihdam dilin hremna eng pawh thleng se a pawm ang tih a sawi bawk.
Academy in kum 10 chhung atan an Ban tih an puanzar ah hian lemchan thiam ber lawmman an pek ‘Best Actor’ award erawh an chhuh let dawn lo thung. Mahse thil thleng vang hian Will Smith hma hun hi a chiang lo hle a, a Project hmachhawp hrang hrang te chu buaipui theih loh in a awm mek ani.
