Mandalay ramțhen Myikthila distric Wandwin khawpi ah ralkap hnenih mi zuarthlaitu mipa khat cu November 14 zinglam suimilam 9:00 hrawngah meithal in vei 4 an kap ih a hmun rori ah a thih thu tualsungmi pawl hnenin theih a si.
“A hmin cu Chiat Phawng (ချက်ဖောင်း) an ti, Shwe Nann lakphak dawr ih a to laifang ah meithal in vei 4 an kap, a hmun rori ah a thi ih, siizung motor thawn an phurhmi kan hmu” tiah tualsungmi pakhat in a sim.
Meithal ih an kah thatmi cu Wandwin khawpi Bahu veng ih um Ko Tin Myo Htun @ Chiat Phawng a si. Myikthila distric Myikthila, Tharsii, Wandwin le Mahlaing ih PDF pawl komkhawm in kan kahmi a si tiah thuthannak an nei.
Meithal ih an kah thatmi cun CDM cangvaihnak teltu acozah hnațuantu pawl a zingzoi ih ralkap hnenah a sim, PDF pawl cu mipi in an zum sual theinak dingah a cangvai, ralkap council dinpi lotu pawl a zingzoi ih ralkap pawl sim in a kaihter, cuti vekih a cangvaih ruangah kan kahnak a si tiah thuthannak ahcun an tarlang.
Wandwin khawpi ah tualsung minung pawl cu ralkap kan lo kaiter ding tiah a rak tongtu phungki pakhat le Pyo Saw Htay sungtel USDP sungtel pakhat cu November 11, 12 ah meithal in an rak kap that zo.
