Khawvel huapa lingerie brand lar leh hlun Victoria’s Secret chuan an brand history ah a hmasa ber tur in Down syndrome natna in a tlakbuak chu Model atan an hmang dawn.
Sofía Jirau hi kum 24 a upa a ni a, Puerto Rico model ani. Instagram kaltlangin Victoria’s Secret’s brand campaign thar a thlan a nih thu a sawi a, he undergarment collection thar hi ‘Love Cloud’ tia koh ani ang.
“Engtik ni ah emaw chuan ka la tel ve ngei ang tiin ka suangtuah thin. Vawiin hian ka duhthusam chu a thleng dik ta. Ka thuruk lian tak chu ka hrilh thei tawh che u. Down syndrome in a tlakbuak zinga Victoria’s Secret model hmasa ber tur ka ni” tiin chhuang takin a hlawhtlinna chungchang hi a tarlanga, Victoria Secret ten VS chhungkua ah hlim takin an lawmlut.
Sofia Jirau hi Victoria’s Secret ten an campaign thar ber a hmeichhia 17 an thlanchhuah zingah a tel a. Kum 2 liam ta atang khan Puerto Rican model hian modelling career tan chho tawh in New York Fashion Week ah te pawh a tel tawh ani.
Mimal in website a hawng a, hetah hian khawvel huap a fashion show lian tham ber ah runway chu a chak leh a suangtuah thin a nih thu a tarlang bawk. Modelling piah lam bakah clothing leh accessories line a khawih tel a, 2019 ah a clothing line hi tlangzarhna a nei.
A tet te atanga a lo suangtuah tawh a hlawhtling tur hi a phur hle a, Love Cloud Collection campaign ah hian Sofia hi Hailey Bieber, Valentina Sampaio, Paloma Elsesser leh Adut Akech te nen an inlan ang.
