Nula nalh, hmeltha, fing leh fel chungchuang thlanchhuahna Beauty pageant sang tak Miss Universe 2022 chu January 15, Pathianni khan New Orleans, USA a Ernest N. Morial Convention Centre ah a hmawr bawkna neih a ni.
Tun tum hi Miss Universe thanna vawi 71 neihna chiah a ni a, nikum December thla a neih tawh tura ruahman ni mahse FIFA World Cup nen a indipdal dawn vangin a hun an sawn hlat phah. Ram hrang hrang 80 chuang in an ram nula thehchhuah tha ber ber atangin US aiawh a inlan kum 28 a upa R’Bonney Gabriel chu Miss Universe 2022 atan puan niin Miss Universe lallukhum a khum haw.
United State hian Miss Universe title hi an kawl nual a, tun hi he title vawi 9 an kawl na chiah a ni nghe nghe. Venezuela nula Amanda Dudamel chu first runner-up a ni a, Dominican Republic aiawh a inlan Andreina Martinez chu second runner-up ah puan a ni bawk.
R’Bonney Gabriel hi March 20, 1994 khan San Antonio, Texas ah piang in a pa hi Filipino a nih laiin a nu hi American a ni thung. Filipina-American ah Miss Universe lallukhum a khum hmasa ber.
Model, fashion designer leh sewing instructor a ni a, zirna lam ah University of Southern California ah psychology degree neih tum in a beimek a, 2018 khan University of North Texas atang Fashion Design with a Minor in Fibers ah Bachelor degree a nei a, a ma pual sustainable clothing line, R’Bonney Nola ah CEO a ni mek bawk.
India ram aiawh a chhuak Divita Rai erawh beisei a pha lo thung a, Top 16 thleng a inhlangkai a ni.
