Hetiang hi a thleng khat a, nu leh pa tam takin an tawng zen zen lo. US a nupa tuak khat te chuan fa atan phir an nei a, mahse an fate hi phir an ni na chungin an pian kum a in ang lo a ni.
Denton, Texas a cheng Kali Jo Scott, 37 chuan January 11 ah caesarean section a nau nei turin a in beisei diam tawh a, kum 2023 ah a fate hi piang turin an ring. A fa neih hun tura an lo rin ai hma in December 29 ah damdawiin a kal chu a blood pressure en dik turin an lo admit.
Damdawiin ah rei pawh a awm hman lo a, December 31 ah chiah zan dar 11:55 p.m. ah a fa hmasa ber turin Annie Jo a nei a, minute 5 hnu lawk ah a phir pui turin 12:01 a.m., January 1 ah Effie Rose chu a nei leh a ni. An pian hun hi inhnaih hle mahse pakhat zawk kum 2022 ah a piang a, a fa pakhat in kum 2023 hmel a hmu ve ta thung chiah a ni.
Heng hi khawvel hmun thenkhat ah kum tin thleng hriat tur a awm thin a, tam tak tan erawh tawn theih mai a harsa hle. Kali Jo Scott chuan Good Morning America hnen ah mite tawn zen zen loh a tawng chu a nawm dan a dangdai hle tih a hrilh a, a fa phir te hian eng emaw danglamna bik tak neia an rawn thanlen chhoh ngei a ring tlat bawk tih a sawi.
Kum 1 liam ta khan Kali chunga thleng ang hi Salinas, California a cheng Fatima Madrigal in alo tawng tawh bawk a. A fa phir hmeichhia te chu kum 2021 leh kum 2022 ah an piang a, an inthlauhna hi minute 15 chiah a ni.
