Mitam tak ten an suangtuah leh chak thin pakhat chu vawikhat pian ve man a hausa tak, duh leh it zawng a piang awlsam tak a neih zung zung hi a ni ang. Hausak duh lo mihring chu an vang khawp ang le.
US a khawsa rawlthar pakhat Donald Dougher hian news hrang hrang a luah nasa viau mai, a chhan pawh a kum phu loh a a hausak em vang hi a ni.
US a naupang hausa ber ‘The Richest Kid in America’ tiin a inchhal hial a, kum 15 lek ni chungin a duh leh it ang a piang te chu a lei thei zel bawk. A hausakna hi a zat chiah sawilang lo mahse maktaduai a kai tawh tih erawh a sawi thung.
Donald chuan thla tin £17,000 vel a hlawh ziah thu a sawi a, a pawisa lakluhna bul ber hi YouTube channel atang niin 2019 khan bul a tan a, hemi hnu hian Social Media platform dang Tiktok leh Instagram ah te a in zarpharh leh bawk.
A video te hian maktaduai thlirtu a nei tlangpui a, ad revenue atang in sum eng emaw zat a hui lut cher cher, chu chuan nuamsa takah a siam theih phah. US ah hian dan ang takin lirthei la khalh thei lo mahse lirthei man to leh changkang luxury car eng emaw zat a hung thluah a, a lirthei neih zingah McLaren leh Bugatti supercars te a tel ani.
Hmun hrang hrang ah Holiday hmangin a zinkual fo thin a, chenna in hrang hrang a nei bawk. A thil neih zingah a pheikhawk man atan sum tam tak a seng ral thin tih Truly te a hrilh. Retheihna awm zia hre map lovin a seilian a ni tih a chiang reng mai.
