Tu te pawh in ngaihsan zawng kan nei theuh hlawm a, he pa erawh hi chu a duh zawng hi han en liam sak ngawt chu a harsa deuh a ni ngei ang.
Uttar Pradesh a state-run power distribution company a mi officer pakhat chuan a Office chhung ah Al-Qaeda terrorist khaidingtu ber Osama bin Laden thlalak a tarchhuah vangin a hnathawk mek atang chawlhtir (suspend) a ni.
A hna chan tu officer hi Ravindra Prakash Gautam niin Dakshinanchal Vidyut Vitran Nigam Ltd (DVVNL) ah sub-divisional officer (SDO) dinhmun a luah mek a, office a bin Laden thlalak a tarna hnuai chiahah fakna thuziak leh zahna “Respected Osama bin Laden, world’s best junior engineer” tih chu a dah lang tel bawk.
Thlalak hi Social Media ah a darhchhuak leh ta si a, sawisel a hlawh nasat hnu ah thu neitu sang te beng a thleng nghal. Senior district officials chuan thuchhuah siam in office chhunga thlalak a tar vangin Ravindra Prakash Gautam hi a hna atang in suspend a ni tih an puang a, Osama bin Laden thlalak pawh lakthlak nghal ani.
Farrukhabad District Magistrate Sanjay Kumar Singh chuan hemi chungchang ah hian chhuichianna kalpui mek a ni tih a sawi. Suspend tawk officer, Gautam erawh in a thil tih ah hian engmah thiamlohna a neih loh thu a sawi thung a, tu pawh in ngaihsan zawng neih chu a theih thu leh thlalak a tar vangin terrorist a thlawp tihna a nilo a ti. A thlalak tar hi lakthlak sak ni mahse a dang tam tak ala kawl tih a sawi bawk.
Gautam hi Lucknow mi a ni a, mechanical and electrical engineering ah diploma degree nei kawp in B Com leh LLB degree te a nei tel nghe nghe. Khawvel ti thlabar a mite huat rawn em em ngaisang tu a nihna chu a chhiatpui ta a ni ber mai.
