Saklam Tlangpar miphun hriamkai unau thum, MNDAA, AA le TNLA pawl le Kawl ralkap nasa zetin an kapaw, Kawl ralkap lam an ralbawipi telin mi 11 rori an thi.
Tuizing, May 31, zinglam nazi 12:45 (Zanlai) ihsin nazi 3:45 tiang rori Shan ramkuklh saklam Kutkai peng နမ့်ဖတ်ကာ kiangkap ih ummi နမ့်ခိုင် Lilawn၊ နားနွယ်၊ ပန်ကိုင်လမ်းခွဲ၊ ရီးယာန်၊ နမ့်ဖတ်ကာ ih Kawl ralkap sakhan tipawl ah Saklam tlangpar miphun unau thum kawm le Kawl ralkap pawl nasa zetin an doaw tiah theih a si. Hivekin sak lam tlangpar miphun hriamkai unau thum kawm pawl ṭangrual in nasa zetih Kawl ralkap pawl an do ruangah ပန်ကိုင် lamzin pial လျှပ်စစ်ရုံ kiangih Kawl ralkap ṭanhmun khuarnak sakhan hngetkhoh zet pakhat cu tuizing ah an laksak thei i, hriamhreipi pahnih le hriamhreite dangdang tam zet an laksak.
Tuizing an kahawknak hmun လျှပ်စစ် ရုံ sungih Kawl ralkap ṭanhmun khuartu pawl hi an zaten an thi thluh tiin 7Star Media cun an tarlang. ရွှေဖီမြေ thuthang cun Kawl ralkap 11 an thi ih mi 15 an hlo tiin an tarlang. Khawsung mi pakhat cun “Zanlai ihsi rori an kapaw ih, zanvar kan itthat theilo a si bik. Khawsung mipi pawl kan lungphan in kan cakkhai thluh,” tiin a sim.
Tuizing, Kawl ralkap suamhmang pawl ṭanhmun khuarnak sakhan, Saklam tlangpar hriamkai unau thum kom in an va donak ih Kawl ralkal lam mithi lakah Battalion hotu ralbawipi khal a tel, an zaten ralkap 11 rori an thi, tiah theih a si. Shan ramkulh saklam Kutkai peng ah hin KIA le Kawl ralkap khal an kapaw ringring ṭheu. AA, MNDAA le TNLA pawl khalin a khat tawk, khat tawk ah Kawl ralkap pawl an do ve ṭheu.
Tuizing, an doawknak ih AA, TNLA le MNDAA pawlin Kawl ralkap sakhan sungih an hriamhrei pawl an laksaknak ah Kawl ralkap pawl hin Cak-hiarnak sii le Rittheihsii an hmang timi an hmuhsuak thu The Kokang Media cun an tarlang. Kawl ralkap pawl hi sualralnak cikim rorin an sual a si hi, an maksak rori ko. Hivekin lungrual tei’ ṭangkhawm in Kawl ralkap pawl an hun do taktak ahcun Kawl ralkap pawl hi an cang thei ve ce lo a si hi.
# Chin Net youtube channel ih tisuahmi Ca ih siar duhtu hrang kan post mi a si.
– Chin Net