Russia leh Ukraine inkar buaina kal zel ah Russia te chu Ukraine hmeichhia te lakah an nunrawnna an lantir thu news hrang hrang ah hmuh tur a tam hle a. Mihring dikna chanvo chu inrahbeh sak in hmeichhia te zahawmna chu tihbawrhbang an ni.
International Criminal Court (ICC) chief prosecutor chuan Bucha chu danbawhchhiatna hmun a nih thu leh rawng takin Russian sipai te civil mite lakah an che tih a sawi a, pawngsualna leh inthahna thleng in Russian troops ten civilians 100 chuang an tihlum tawh tih a puang.
Ukrainian tleirawl kum 16 a upa Karina Yershova chu Russian sipai kut tuar zinga langsar ber pawl ani a. Karina Yershova hi Russian sipai te hian an pawngsual hnu ah khawngaihna tel lova tihlum in a lu ah silai a kah a ni.
He tleirawl Yershova hringtunu thiannu Olesya Vasylets chuan Facebook ah Karina Yershova chunga Russia sipai te chetdan nunrawng leh rapthlak tak hi a puang a, Karina chu hma hun eng tak nei leh talent nei tha tak a nih thu sawiin a chunga thil thleng ah hian Russian sipai te a dem thu a auchhuahpui.
Tarlan dan in Yershova hi thla hmasa March thla tir khan chin hriat lohin a bo a, hmuh hnuhnun berna pawh March 10 ah ani. A nu chuan a fanu a zawn hmuh theih nan midang puihna dil in mahse a fanu a hmu leh meuh chu rilru natthlak tak ani.
Ukrainian MP Lesia Vasylenko pawh in Karina hi Russian sipai ten pawngsual in a lu ah silai a an kah ngei thu hi tweet a siam bawk. Ukrainian President Volodymyr Zelensky chuan Nilaini khan Kyiv leh Bucha ah te hmeichhia leh naupang te tawrhna nasat zia chu finfiahna a awm tih a sawi. Interior Ministry chuan Russia sipai in Kyiv an awp hnu ah mi 720 chuang in nunna an chan thu leh mi 200 aia tam chin hriat loha an bo thu a puang.
Bucha building hnuaiah Ukraine hmeichhia 20 chuang zet Russia in hrengbetin an pawngsual a, an pawngsual zinga hmeichhe 9 te chuan nau an pai tih tarlan a awm bawk.
