He Ukrainian mipa naupang pakhat hi a huaisen em vangin Social Media hrang hrang ah fak a hlawh nasa a, Russia in an ram Ukraine a rûn mek laiin a sahim nan amah chauh in hla taka border a kal thleng.
Kum 11 a upa mipa naupang hi an awmna Zaporizhzhia chhuahsan in zinkawng thui tak a zawh a. A nu in hmun him zawka a awm theihna ngaihtuah in southeastern Ukraine atang in 600-mile zet a hla Slovakian border lamah mahni chauh in a kal thleng zak ani.
Slovakian border a pan ah hian plastic bag leh passport a keng tel a, a kutah chuan phone number a inziak bawk. A kuta phone number hi hmun him a thlen hun a a chhungten a chanchin hria a, an inbiak pawh theihna tur atan ani.
Mipa naupang hringtu nu hian an chhungkaw zing ah damlo enkawl ngai an awm a, a kalchhuah theih loh vangin a fapa hi a zui thei lo a, Zaporizhzhia ah a la awm tih an sawi. Naupang hi border a thlen hian Slovakian authorities leh Volunteer dang ten buaipui in ei leh in tur in an lo hraipuar. Slovak Ministry of Interior chuan a kum ngaihtuah a zamna leh hlauhna nei miahlo a zinkawng thui tak a zawh chu huaisen an tih zia an tarlang hial.
Naupang nu Júlia Pisecká hian a fapa an lo dawnsan dan leh enkawlna ah Slovakian te hnen ah lungchhe takin lawmthu a sawi a. Pasal sun tawh a ni a, dinhmun khirh takah ding mekin a nu damlo enkawl a ngai bawk nen a fapa kiangah a zui tel theih loh thu a sawi bawk. A fapa hi tunah chuan Slovakian capital Bratislava ah a chhungte kiangah a him tih ministry in a puang.
Kar kalta mai khan Russian troops ten Zaporizhzhia nuclear power plant an bei. Tarlan danin Russia in a rûn hnuah Ukrainian refugees 1.7 million zet chu an ram thenawm hnaih ah an inthiarchhuak tawh a. July thla phei chuan refugees hi 4 million a pung turin an ring. United Nations High Commissioner for Refugees (UNHCR) chuan February 24 atang khan 128,000 refugees ai tamin Slovakia an thleng tawh tih an tarlang bawk.
