UN Myanmar Ambassador U Kyaw Moe Htun cu American ram ih International Republican Institute (IRI) cun Zalennak Sualtu Miraltha tiah John S. McCain Freedom Award an pek ding thu theih a si.
International Republican Institute (IRI) ih pek dingmi Freedom Award ngahtu pawl cu Lithuania Prime Minister Ingrida Symonyte, UN Myanmar Ambassador U Kyaw Moe Htun, Belarusian Political Prisoners Council palai Tatsiana Khomich le Cuban Grammy Award Winning Artist ngahtu Willy Chilino pawl an si.
Freedom Award laksawng peknak puai cu October 19 ah an tuah dingih Republican Upper House Senator Mitch McConell, IRI chairman Senator Dan Sullivan, Senator Joni Ernst, Senator Lindsey Graham le Senator Rick Scott pawl an telve ding.
International Republican Institute (IRI) cun 1995 ihsin ‘Freedom Award’ peknak an rak thok ih leitlun mipi hrangah zalennak sualtu miraltha pawl an rak pe. Myanmar ram ihsin Daw Aung San Suu Kyi khalin 1999 ah hi Freedom Award cu a rak ngah ve.
U Kyaw Moe Htun cu Myanmar rampi ralkap in thuneihnak an lak hnu February 26 ih tuahmi UN emergency meeting ah ralkap thuneihnak dokalh in a kutzung thum a tung ih “Nehnak Cu Mipi Ta A Si” tiah leitlun mipi hmaiah raltha zetin a rak aupi.
U Kyaw Moe Htun ih laksawng ngahmi thuhla ah NUG ih Human Rights Minister U Aung Myo Min cun ” International Republican Institute (IRI) ih John S. McCain Freedom Award 2021 an pekmi mipi palai U Kyaw Moe Htun kan lungawipi ngaingai” tiah a Facebook cahmai ah a tarlang.
Tuihlan ah International Republican Institute (IRI) ih pekmi Freedom Award rak ngah zotu pawl cu American President Ronald Reagan, American President George H.W. Bush, American President George W. Bush, Liberian President Ellen Johnson-Sirleaf, Burmese Democracy Leader Daw Aung San Suu Kyi, ramkhel thawngtla le milai covo buaipitu Natan Sharansky le U.S. Secretaries Of State țuanvo rak kaitu Henry A. Kissinger, George P. Shultz le James A. Baker pawl an si.
2020 khalah U.S. Secretary of State Michael R. Pompeo le Hongkong buainak ah raltha zetin zalennak rak sualtu Svetlana Tikhanovskaya, Maria Kolesnikova le Veronika Tsepkalo pawl hnenah IRI cun Freedom Award an rak pe.
2021 Freedom Award cu October 19 ah Lithuania, Myanmar, Belarus le Cuba rammi pawl hnenah peknak an nei ding.
