UN meeting ih ralkap council dokalhtu UN Myanmar ambassador U Kyaw Moe Htun cu a hnațuan kai sunzom dingin leitlun ramtin pawlkom 358 ih open letter cu UN in a cohlan thu Myanmar ram thuhla cangvaitu Progressive Voice ih Daw Khin Ukma in a Facebook cahmai ihsin mipi theihternak a nei.
Atu ahhin Ambassador U Kyaw Moe Htun cu UN Myanmar Ambassador dinhmun in UN meeting a kai rero lai thu, UN palai hrangah ralkap council palai le NUG palai cu UN in a rel sunzom vivo dingih December thla ah result a suak thei ding tiah Daw Khin Ukma cun a sim.
UN palai zohfeltu Credentials Committee ahhin ram 9 an um ih, hi ram 9 in an hrilsuahmi cu 2022 ihsin UN ah Ambassador dinhmun in meeting a kai ding. Myanmar thuhla ah SAC maw NUG a hril ding timi thuhla ah mipi cun tuini September 14 ih tuahmi UN Assembly hi an cuan ciomi a si.
Ralkap council ih thlahmi UN palai cu UN assembly ah kai lo dingin American le Tuluk an lungkim thu, Ambassador U Kyaw Moe Htun khal UN Assembly ah thusimnak nei lo dingih an lungkim thu, U Kyaw Moe Htun cu November tiang Ambassador țuanvo a kaih ding thu American hrambun FP in a tarlang.
