India ram a nula fing leh nalh thlanna neih thin national beauty pageant, Femina Miss India 2022 thlanna chu Pathianni zan khan Mumbai khawpuia Jio World Convention Centre ah a hmawr bawkna neih fel a ni.
Miss India 2022 thlanna ah hian Mizoram aiawh in Miss India Mizoram, Lalramhlui Sailo chu a inlan a, mahsela vanduaithlak takin Hlui Sailo hian a tawp a thleng zo ta lo a, ‘Miss Beautiful Skin’ sub title lawmman erawh a dawng thung.
Mizoram aiawh a penchhuak Hlui Sailo hi Gov’t Johnson College ah BA a zir mek a ni. Miss India a tel chungchang ah Hlui Sailo chuan Social Media kaltlang in Mizoram mipui te support na ah lawmthu hrilh in chutih rualin an beisei ang a thlen phak loh vangin pawi a tih thu a sawi a, amaherawh chu tun hi a tawpna mai tur a nih loh thu a sawi bawk.
Hlui chuan “Mizoram mipuite in beisei ka thleng phak lo hi a pawi ka ti a, in mi tawngtaipui na leh support na zawng zawng erawh tun mai nilo, ka kal lehzel na tura ka vawn reng leh ka ngaihlut em em ani reng ang” a ti.
Sawi chhunzawm zel in “Tun hi ka tawp na tur nilo se, ka kal lehzel na ah pawh min hria a min support zui zel ka beisei. In zavaia chungah thinlung takin lawmthu ka sawi e” tiin hmalam a pan lehna turah mizoram mipui te a hma ang a thlawp zui zel turin a ngen a ni.
