Kar hnih liam ta mai khan Morocco a Ighrane, Chefchaouen Province ah mipa naupang kum 5 Rayan Awram chu tuichhunchhuah 100ft thuk ah tla in ni 4 lai chhanchhuah tum a beihpui thlak a nih hnu ah thi in a ruang an la chhuak ani.
Morocco a thleng ang chiah kha Afghanistan lam in an tawk ve leh mek a, Shokok village, Zabul province, southern Afghanistan ah kum 9 upa mipa naupang Haidar chu tuichhunchhuah ah tla in a tang ve leh mek.
Haidar tlakna hi 33ft a thuk ah a ni a, ni 2 a tanna a ni tawh. Chhanchhuah tumin operation neih a ni a, mipa naupang dinhmun hi tun ah chuan a la tha tih an tarlang. Hrui hmangin camera an thlak thla a, Afghanistan’s new Taliban government ten video phochhuak in Haidar hian a ban leh a kawnga chin chunglam ala ti che a, a mangang hle tih a hriat. Chhanchhuah a nih hun nghakhlel takin mittui nen a thlir.
Rescuers ten mipa naupang him taka lakchhuah anih theih nan theihtawp an chhuah a, chawlhkar hnih liam ta mai a Moroccan mipa naupang tuichhunchhuah a tang chhanchhuahna tawp dan lungchhiatthlak tak ang kha chuan a thlen loh ngei an beisei bawk.
Deputy Prime Minister Mullah Abdul Ghani Baradar secretary Abdullah Azzam chuan Twitter ah Haidar tlakna ah hian team te chu ambulance, oxygen leh thil tul pawimawh dang nen an awm tawh thu a tarlang ani.
Thla hmasa a emergency services ten kum 5 upa tuichhunchhuah a tang Rayan chhanchhuahna rescue mission an neih khan khawvel in beiseina sang tak nen a thlir a. Mahsela an beisei angin a thleng thei ta lo. Rayan hi a pa in tuichhunchhuah a siam thatna ah a chesual palh a, a thihna hian mitam tak thinlung a hneh hle. A vuina ah pawh mi 100 chuang zet an pungkhawm ani.
