Afghanistan ram Shokok village, Zabul province a tuichhunchhuah a tla mipa naupang kum 5 Haidar chu a nunna chhan tuma beihpui thlak a nih atang ni 3 ah chhan theih lohin a boral ve leh tih puan ani.
Haidar hi Thawhlehni khan tuichhunchhuah ah a tla a, puitling zawk midang a puihna lamah tuichhunchhuah khur chhung ah hian a tla niin a pu Haji Abdul Hadi, 50 chuan a sawi. 33ft ah a tang a, a nunna chhan tum in rescue operation neih nghal ni mahse hlawhtlinna a awm ta lo.
Mipa naupang khawngaihthlak Haidar chhanchhuahna ah hian rescue team ten an theihtawp an chhuah a, lei an laih zawngin hnuai lam ah vaivut/lei leh thil dang in naupang hi a tlak mai theih reng vangin fimkhur takin lei laih hna hi thawh a ngaih thu an sawi.
Zabul police spokesman Zabiullah Jawhar sawi danin rescue team ten Haidar awmna hi zuk pawh in an lachhuak a, lakchhuah a nih hlim hian thaw in nungdam in ala awm. Medical team ten oxygen an pe nghal. Mahse chhanchhuah a nih hnu reilo ah medical team lam in helicopter a Kabul lam panpui tuma an hlangkai chu a nunna chan zuiin mihring an in chan zo ta lo tih a sawi.
Taliban interior ministry senior adviser Anas Haqqani chuan Haidar boral thu leh rescue operation a hlawhchham thu hi lungchhe takin a puang. Rescuers ten chawl lovin rim takin thawk mahse mipa naupang nunna chhan theih a ni ta lo chu pawi an tih thu an tarlang ani.
He vanduaina thleng hi a tir phat atang in ngaihven a hlawh nghal a. Hetiang deuh chiah hian kar hnih liam ta mai khan Moroccan mipa naupang Rayan Awram pawh tuichhunchhuah 100ft ah tla in ni 4 chhung chhanchhuah hnathawh hnu a ni 5 na ah thi in a ruang an lo lachhuak.
