He buaina hi chu film leh movie lam te nen a in ang viau zawk a, mahse a tak tak a thil thleng ngei a ni bawk si. A tuartu tan a rilru a natdan tur hi.
2015 khan India ram Aligarh a hmeichhia kum la naupang tak temple tlawha a kal chu in lam ah haw tawh lovin a bo zui a, a bo hnu lawk reilo ah hmeichhe ruang chhar in a chhungte pawh in an fanu ruang a ni tiin an pawm nghet hmiah.
A thihna chungchang ah hian hmeichhe chhungte lam hian thubuai an thlen a, mipa pakhat Vishnu chu tualthattu ah puhin thiam loh chantir a ni. 2015 atangin Vishnu hi tualthah thubuai a awrh a, Jail ah tantir a ni.
Mahsela tunhnai lawk khan he buaina ah hian thu thar hriatchhuah leh a ni a, thah ang a boral nia puan fel tawh hmeichhia chu nungdam in alo la awm reng a, damin hmuh a ni mai chauh nilovin pasal neiin fa 2 lai a nei tawh bawk.
Hetia a hmeichhia ber dam a hmuh a nih leh hnu hian thubuai awrhtir Vishnu chhungte chu nasa takin an thinrim a, Police ten thubuai hi chhui that hna thawk in hmeichhia hi custody ah thu zawhfiah turin an la.
A bo hun tak hi 17 February 2015 ah a ni a, hetih lai hian kum 17 lek a upa a ni. Thla 1 a liam hnu ah a kum rual vel ruang chhar a ni zui leh ta mai si a, hmeichhe chhungte hian an fanu hi Vishnu nen hmuh hnuhnun ber an nih thu sawiin an tang ve tlat a, Vishnu hi thiam loh chantir a nih phah.
Vishnu hi kum 2 Jail a tang phawt a, 2017 ah bail a chhuah lailawk niin mahse hmeichhe chhungte hian Jail a kir leh tura Court ah ngenna an thlen a, Jail ah khung leh a ni. Vishnu hringtunu hian a fapa dikna hailan ngei tumin theihtawp a chhuah hnu ah thudik tak hi hriat theih in a awm phah a, a fapa thah anga puh hmeichhia hi Agra ah alo khawsa daih a ni. Hetia dawt leh diklo taka thiamloh chantir an nih vangin hmeichhe chhungte hi an khing let.
Court chuan hmeichhia hi DNA test ti turin a hriattir a, Vishnu nu hian hmeichhe chhungte lam in inrem taka awm thei turin an buaina hi chinfel pui tura an nawrluih thu a sawi bawk.
