Shan ramkulh nisuahnak lam Triangle Military Headquaters hnuai Engineer Battalion 913 ih ralkap pakhat cu November 26 zaan ah meithal thawn an kap that tiah theih a si.
Thihnak tongtu ralkap cu Triangle Military Headquaters hnuai Engineer Battalion 913 ih ralkap senkhat Hla Maung Thein a siih, Nawngnun (နောင်နွန်း) gate ah a thi tiah theih a si.
“Meithal thawn a awm ah an kap that tiah kan thei, meithal thawn vei 4, 5 an kap, a thitu ralkap hi tlangval a si, thuhla phuansuah lo theih lo a si ruangah a lenglam ahcun amahte a thi an ti thu kan thei, a ngaingai ahcun amahte a kap that aw maw, a hnațuanpi pawl thawn an kap aw maw kan theifiang lo, thilthlen caan hi zaanlam suimilam 6:00 – 7:00 karlak a si” tiah hmin tarlang duhlo mi pakhat in simnak a nei.
Hi thihnak thuhla thawn pehparin ralkap senkhat Hla Maung Thein cu amahten meithal thawn a awm ah a kap aw ih a thi tiah Triangle Military Headquaters ah thuhla theihternak an tuah ko na’n, thilthlen dan dik tak hi nemhnget theih a si hrih lo.
