Khawthlang nupa inkhinna lar tak ‘Amber Heard vs. Johnny Depp’ case neih zawh tak ah Johnny Depp an hnehna a chan hnu in Depp tana ding a lawyer Camille Vasquez chuan fak a hlawh hle ani.
Report in an tarlan dan in Camille Vasquez hi a vawi hnih nan Court trial neih leh turah Johnny Depp tan a ding leh dawn a, he case erawh Amber Heard nen inkungkaihna a nei tawh lo thung.
Crew Member zinga pakhat in Johnny Depp laka thubuai a thehluh ah thla thar July hian trial neih leh tur ani. Depp laka thubuai thehlut tu hi Gregg “Rocky” Brooks a ni a, 2017 a ‘City Of Lies’ Movie an buaipui laiin location manager in a awm a, Johnny Depp hi a lakah mawi lo taka che in kut a thlak thu a sawi ani.
Mr Brooks hian a sawidan chuan Depp hian vawi 2 lai a hnek a, tawngkam chhe tak tak tawngkhum in hetih lai hian zu a rui tih a sawi. 2018 khan Los Angeles Superior Court ah thubuai hi thlen in Depp hian a tum reng vanga kuttthlak in a tithangtlawm hle a ti bawk.
He thubuai hi July 25 khian trial neiin Los Angeles County Superior Court, United States ah ngaihtuah leh a ni dawn a, Camille Vasquez hi a thawhpui Randall Smith nen ‘Pirates of the Caribbean’ star tan lawyer in an ding leh dawn ani.
Depp lawyer atan a Ms Vasquez a din leh tur thu hi hriat a nih rual in fans tam takin duhsakna an hlan a, mahse he trial bik hi chu TV lamah Amber Vs Depp case angin Live a pek chhuah a nih hmel loh.
Camille Vasquez hi Amber leh Depp te inkhinna ah a in rintawkna leh a thusawi reng reng a a dinngheh tlat vang te in fak a hlawh viau a, Depp chak chhan ah thil dang chu eng pawh nise Camille vang hi ani pakhat a tih theih ang.
Amber Heard ngei pawh in NBC hnen a Interview a neih ah Camille Vasquez chu a hna thawk tha tak ani tih alo hrilh a, an buaina laimu tak atangin jury te rilru suk thlek a kuai peng thiam a ti. Depp a chak pui vangin Camille hi a thawhna firm ah dinhmun sang zawk a kaisan tir a ni hial bawk.
