Tihpalh hi chu khawi hmun ah pawh thleng thei reng ani. Hong Kong a Mong Kok a toys zawrhna dawr changkang designer toy store ah chuan chhungkaw pakhat in buaina an tawk a, toys enkuala lenglut in vanduaithlak takin an fapa pakhat zawk in dawr chhunga an thil zawrh to ber pawl chu tichhia in pawisa tam tak chawitir an ni.
Pa ber Cheng tia a hming tarlan hian dawr nghak tu te lamin a fapa kum 5 miin 1.8-metre a sang an dahchhuah Teletubbies doll chu pet in a tichhia tih an sawi a, cheng nuai 3 chuang zeta tam pawisa an chawi tir.
Thil thlen lai hian Cheng hi pawn a Phone a hman zawk hlan a ni a, thawm ri a hriat hnu ah a va luh leh chuan chhuat ah toys te hi a lo tla keh rum tawh. Dawr neitu KK Plus te hian tihpalh a ni tiin tawngkam ringawt in an ngaidam thei silo a, a man pangngai HK$52,800 (Rs 5.22 lakh) aia hniam in HK$33,600 pe turin an hriat tir. Hei hi India pawisa in Rs 3,30,168 lai ani nghe nghe.
Cheng pawh in a fapa thiam loh a ni tia sawi buai lovin chawi tura an tih ang chu a rem ti mai a. Mahsela CCTV footage ah thil thleng landan enchian a nih chuan a fapa hi diklo taka mawhpuh a ni tih a hrechhuak. Toys hi a pet ang a an sawi chu a fapa hian pet loin hnungchhawn zawng a va nghen a tumna lamah rinloh takin a tlu palh zawk ani.
Hong Kong radio station te hnen ah Cheng chuan thil thleng hian a fapa a nghawng phah nasa a, hei vang hian School kal pawh a duh loh phah tih a sawi. Social Media lamah Cheng leh a chhungte tan tu tam tak an awm a, KKPlus demtu an tamin an thil zawrh lai hlu tak tur chi te chu palh thleng lo turin midang dipdal lo zawng a dahsawn turin an ti a, an hmingchhiat phah hle bawk.
Amaherawh chu KKPlus te hian thuchhuah an siamah toy chhe ta hi nikum November atang tawh in a awmna ngaiah an dah reng a, customer tumah in buaina a thlen thu complaint engmah an dawng lo tiin an sawi. Tunhnu a a thlen nawn tawh loh nan fimkhur na ni rawhse an ti a. Mahse statement an siam hi a hnu lawk ah an delete leh tih hriat ani.
