Yangon ramțhen Țuițu (တွံတေး) peng Lakabon khua ih Mytel tower kiltu ralkap 2 thah an si hnu, Mytel tower kiang Phayagyi khua ih duhphorhnak hotu Ko Htet ih inn dothnih cu November 26 zaanlam suimilam 6:00 hrawngah ralkap 30 hrawng feh tahratin thusuahmi an tar ih an kharsak tiah tualsungmi pawl hnenin theih a si.
“Hi leilung hmunram le inn cu PDF thawn pehtlaih awknak a neih ruangah rampi thilri ah kan long a si” tiah ralkap pawlin thusuahmi an tar. March 17 khalah hi inn cu ralkap 80 hrawng cun motor tumpi 6 le motor fate 2 thawn an feh ih a țumkhatnak an rak cil.
“Cumi lai ahhin thuhla theihcia deuh a si ruangah an ra tlan man, cuti si lo sehla an zaten an kai thluh ding, atu an sungkua in humhimnak hmun ah an um, kannih khalin kan pehtlaih thei lo, khuitawk an thleng timi khal kan thei lo” tiah Phayagyi khuami pakhat in a sim.
Ko Htet umnak khua kiangkap ah ralkap council retmi khawbawi le dalan thah an ton tinten ralkap pawlin a inn cu an luhcilh ringring tiah a sim bet. A inn an luhcilhnak hi țum 6 a siih tuițum cu casuahmi tar tahratin an kharsak tiah theih a si.
November 19 khalah Țuiți (တွံတေး) peng Sann khua ih Mytel tower kiltu ralkap 2 an kap that. Cui kahawknak cu PDF (တွံတေး) ih tuahmi a si thu an social media ah thuthannak an nei. Cui thilthleng a um hnuah Phayagyi, Kyaittale, Lakabon, Pauhțaw, Sann le Kanbe khua pawl cu ralkap pawlin an rak cil ciamco ih khawsung minung pawl khal an kai tiah theih a si.
Atu ahhin ralkap pawlih kaihmi tualsungmi pawl cu hmun an khuarnak Sann khua ah an ret ih mi ziangzat an si timi zinzoi rero lai a si thu theih a si.
