Mague ramțhen Toungdwingyi khawpi Ungtaw veng 2-nak ukawknak zung ah kilhimnak țuanvo neitu ralkap pakhat cu October 27 zinglam ah a ruak in an sar thu veng zung kiangkap umtu pawl hnenin theih a si.
Veng zung kiangkap ih umtu mi pakhat in “a thitu ih hmin cu ka sim lo ding, zaan ah zu-in in a itthat, zinglam ah a tho nawn loih thi cia in an hmu, zung sungah ralkap 5, 6 hrawng an um” tiah a sim.
Ralkap thitu hi kan dung baite ah Covid – 19 khamnak sii a dawt tiah siizung thawn naivai pawl hnenin theih a si.
“Toungdwingyi siizung hmuan sungih um peng harhdamnak zung ih hnațuantu nunau pakhat khal September 17 ah Covid – 19 khamnak sii a dawt hnu a dam lo ruangah siizung an um ih a rak thi dah zo, cui thuhla cu thuthang suah lo dingin ralkap council cun an phih” tiah hmin tarlang duh lo harhdamnak hnațuantu pakhat in a sim.
Toungdwingyi peng ah harhdamnak zung ih hminsin dan vek asile Covid – 19 khamnak sii dawt hnuah thihnak tongtu mi 2 an um ih, cumi hnakin an tam thei timi khal harhdamnak hnațuantu in a sim bet.
Kan dung September thla khalah Ungtaw veng 2-nak ukawknak zung ah ralkap pawl cu zu an ri ih tualsung minung pakhat an rak hrem that zo.
