Shan ramkulh saklam Namkham peng Manh-mai le Namma khua karlak ah TNLA le ralkap cu tuini August 8 zinglam suimilam 3:00 hrawngah an kap aw ih ralkap lam ihsin mi pakhat a thi, tualsungmi pakhat in cerek hriamhma a ngah tiah theih a si.
Hi doawknak cu suimilam hrek tluk lawng a rei nan, ralkap sakhan Cu-saing le sakhan thar umnak tlangpar ihsin suimilam 6:30 tiang hriamhreipi an kap ciamco.
Tualsungmi pakhat in “tuizing ah ralkap sakhan cu TNLA in minute malte an kap, sakhan thar umnak tlangpar ihsin ralkap pawl cun anmahten hriamhreipi an kap ciamco” tiah a sim.
Meithal kah puak thawmvang thei in sangka ong ih va zohtu kum 70 mi Khin Swe Cawng cu a ka ah cerek in a ngah, a hriamhma tuamhlawm dingin Namkham khawpi siizung ah an fehpi tiah theih a si.
TNLA thusimtu Lt. Col. Mai Ai Kyaw cun doawknak thuhla kan hnenah zianghman a thleng hrih lo tiah simnak a nei. Namma khawsung ahcun a puak hrih lomi hriamhreipi cerek pakhat a um thu khal tualsungmi pawlin an sim.
Namkham peng sungah hin KIA, TNLA, MNDAA, SSPP hriamkai pawl an cangvai ih ralkap lam in doawknak an thok țheu ruangah tuletu doawknak a um tiah theih a si.
