Zirtawpni liam ta mai khan Sydney ah Tiktoker hmeichhe pakhat chu live-streaming a neih lai mek a buaina tawkin Acid hmanga beih ani.
He Tiktoker hi a hming Jenny Elhassan, 32 a ni a, Zirtawpni dar 11pm vel khan Dixon Street, Haymarket, Sydney a Old Town Hong Kong restaurant ah thil a ei a, Restaurant a chhuahsan lai hian livestream a nei pah bawk.
Restaurant atanga chhuak pah a livestream a neih mek lai chuan mipa pathum SUV dum a chuang te chu a lam pan a tlan in an zinga pakhat chuan acid in Jenny Elhassan hi a theh zui ta mai ani.
Ms Elhassan hi acid a theh a nih hian a na ti lutuk chu a auchhuak a, engmah a hmuh theih loh thu leh tui a mamawh thu sawiin a thawk that theih loh thu a sawi bawk. Restaurant staff te chuan tui bottle an pe thuai a, paramedic te thlen hma in Royal North Shore Hospital ah a hmaia a hliam te enkawl tura hruai nghal ani.
Elhassan chuan damdawiin atangin Acid beih a tawhna lama a hliam thenkhat a mitko leh a nghawng te chu a tilang a, thil thlen lai hian tarmit alo bun hlauh zawk a, tarmit vuah lo phei se a chunga thleng tur hi a ngaihtuah ngam loh thu a sawichhuak hial bawk.
Police lam ten thil thleng chungchang ah hian NSW Fire and Rescue HAZMAT crews te puihna an ngen nghal a Sydney City Police ten investigation an nei bawk. Pawikhawih tu te hian Elhassan an beih lai hian mask an vuah tlat vang in tu tih hriat theih mai an nilo a. He thu buatsaih thleng hian misual te hi man an la nilo ani.
