Ralkap council in February 1 ih rampi thuneihnak an lak veten an kaihmi rampi thuron Daw Aung San Suu Kyi cu thubuai an tuahsakmi lak ihsin Yarzatetgyi pukmah 505(b) cu October 26 ah Naypyitaw thuțhennak zung ah an rel ih amah rori in tetti dinhmun in thurelnak a nei tiah theih a si.
October 26 ih Naypyitaw thuțhennak zung ah khatlam khatlam sihni pawlih thusuhnak cu Daw Aung San Suu Kyi amah rori in thu lehsalnak a nei.
“Daw Aung San Suu Kyi cun hi casuahmi thuhla cu ka thei lo tiah a el ko ding, a el timi khal kan thei, ziangruangahtile ruah rero khalah a fiang tukmi a si, February 1 ih kaih tongtu pawlin February 7 le 13 ih casuahmi cu ziangtin an thei thei ding, cumi ruangah a el si ko” tiah thuțhennak zung thawn naivai mi pakhat cun simnak a nei.
February 7 le 13 ah NLD central committee ih casuahmi thawn pehparin rampi thuron Daw Aung San Suu Kyi, president U Win Myint, Naypyitaw council chairman Dr. Myo Aung pawl cu Yarzatetgyi pukmah 505(b) hmangin thubuai an orhter.
Thubuai orhtertu sihni lam cu Daw Aung San Suu Kyi cu CRPH, NUG pe PDF pawl na thei maw timi thusuhnak cu Daw Aung San Suu Kyi cun a theih lo thu a sim tiah kan thei timi khal sihni pawlin an sim.
Hi thubuai orhtermi cu danglam zetin report tuah loin thubuai orhtermi an pathum in anmah rori in tetti dinhmun in thu lehsalnak an nei ih October 26 ah Daw Aung San Suu Kyi cun tetti dinhmun in thu lehsalnak a nei ve.
Kan dungih thuțhennak zung feh caan ahcun president U Win Myint amah rori in thu lehsalnak a nei ih ralkap ih rampi thuneihnak an lak February 1 zingpit ih thilcangmi pawl khal thuțhennak zung ah phuansuahnak a nei tiah sihni pawl hnenin theih a si.
Tuițum cu thubuai tawlreltu Daw Aung San Suu Kyi ih sihni 5 cu pukmah 144 an suahsak ruangah thubuai thuhla cu lenglam pawlkom, media pawl sim lo dingah an kham. Curuangah October 26 ih thuțhennak zung ah Daw Aung San Suu Kyi in thubuai pehparin ziangmi pawl a simsuak timi cu sihni pawl khalin an sim loih thuțhennak zung khalin thusuahmi khal a nei lo.
