Nulepa dinhmun in mai sungsuak fate pawl khaknak thuhla pawl rampi neihmi thuthangca ah tarlang cu daan thawn a kalh ih thuțhennak zung ih thutluknak tuah hnu lawngah daan thawn a mil aw tiah ralkap council thusimtu General Zaw Min Htun in November 26 ih Naypyitaw ah tuahmi thuthangca simfiangnak hmun ah simnak a nei.
“Himi pawl hi daan thawn a kaih aw lo, thuthangca ah tarlang men cu khak-awknak ngaingai a si lo timi kan thei, thuțhennak zung ih thutluknak tuah hnu lawngah a dikmi a si” tiah General Zaw Min Htun in a sim.
Khak-awknak thuhla tarlangmi cu kaih tong lo dingih a hlan ten kilhim awknak men a si tiah a sim bet.
Sihni U Than Zaw Aung cun khak awknak thuhla pawl thuthangca ah tarlang a si ko na’n daan vek asile ro co theinak an neih lai thu a sim. “Khak-awknak cu anmahlemah an tarlang aw men, a ngaingai ahcun khak awknak thu thuthangca ih tarlang a si ko na’n ro cotu ah hlon a si lo, hmuhternak pakhat men fang a si, khakawknak tarlang tinten khakawk lanta ngaingai a si lo” tiah sihni U Than Zaw Aung in a sim.
Cuihleiah khakawknak thuhla tarlang a si ko na’n NUG, CRPH le PDF pawl a thupten an dinpi a si ahcun daan vekin kai ih thubuai tuahsak ding an si tiah ralkap council thusimtu General Zaw Min Htun in a sim.
Ralkap council cun innsang pakhatkhat ah an hawlmi an hmuh lo ruangah an sungkua pawl an kai ih ralhrang dokalhnak daan hmangin an inn pawl cu an long tiah theih a si.
