Airport ah hian bag leh bungraw dang dang bo hi sawi tur a awm fo thin a, thenkhat hmuh an nih leh laiin a then erawh chu hmuh kir leh tur awm tawhlo in a khuangcher bo hmiah a, a uihawmin a hrilhhai thlak thei hle.
IndiGo passenger pakhat pawh in hetiang chiah buaina hi a tawk palh hlauh a. Thlawhna an chuanna ah a luggage chu a chuanpui passenger dang nen inthleng palhin a luggage nilo zawk chu alo hawnpui ani.
Nandan Kumar hian a chuanpui passenger dang nen an luggage inthleng dan leh a hmuh kir dan chungchang hi a rawn puang a, Airline lam te puihna tel miahlo a mahni in haikaw chawp chunga a bag a hmuh kir leh dan hian ngaihven a hlawh phah hle bawk.
Nandan Kumar chuan Patna atanga Bangalore a panna ah IndiGo flight ah chuangin, hetah hian a chuanpui nen an luggage alo in an deuh chiah vangin an inthleng palh a. In a thlen hnu ah a nupui in a bungrua vel a enfel sak chuan a bag nilo zawk a hawn tih lo hre nghal chatin, a pasal Nandan hnen ah chuan a hrilh ani.
Nandan Kumar chuan a chuanna IndiGo customer care chu rang takin a be pawp nghal vat a, mahse tih ngaihna vak a awm chuang lo. IndiGo lam ten privacy & data protection vangin passenger dang te contact detail leh information vel engmah an pe chhhuak ngailo tiin an chhang a, a bag a thlengna passenger chu an biak theih veleh an hriattir let vat tur thu agent te hian an hrilh.
Kumar hian agent lam ten an call let hun hi a nghak a. Mahse darkar 24 hnu ah pawh an call let tak mai loh vang chuan amah ngeiin a bag zawnchhuah dan kawng chu dap in bag tag a co-passengers PNR hmang chuan a bag thlengna address leh contact number chu hmuhchhuah a tum. Tihdan hrang hrang hmanga an beih hnu pawh in vawi 3 vel lai a hlawhchhan a. Mahse beidawng lova a tihzel hnu ah a computer keyboard a F12 key chu hmet zeuh in IndiGo website chu a hack thei tih a sawi.
Website a luh theih hnu ah a bag thlengna passenger number leh email id te chu neiin an inbe fel thei tih a sawi bawk a, an awmna atanga 6-7 KMS velah alo cheng a ti bawk.
A sawidan in a passenger pui contact bakah hian airline website chu relhruk theihna awmin a him tawk lo hle tih a puang a, Kumar hi a twitter bio ah software engineer tiin a indah bawk. He a thil tawn chungchang ah hian Indigo te hi kheng zui sakin pakhat ah chuan customer care service a chhiat hle thu leh data leak a awm thu a hrilh ani. Indigo lam erawh chuan Nandan hnen ah thilthleng vangin ngaihdam an dil a, chutih rual chuan an website ah security lapses a awm lo tiin an sawi ve thung ani.
