Karen ramkulh Phapon peng KNU tatmaha 5 uknak ram မူတြော် distric sungah ralkap le KNU karlak doawknak hi thlakhat sungah țum 134 a um thu August 1 ah KNU in tlangthannak an nei.
July 1 – 31 tiang doawknak țum 134 a um ih ralkap 8 nungcung in an kaih hleiah mi 115 an kap that, mi 101 nasazet in hriamhma an ngah. Cuihleiah ralkap motor 2 an siatsak ih, rang 2 an thih hleiah rang 4 hriamhma an ngah tiah an sim.
Ralkap kuthnuai ih ramri kiltu BGF cun khawsung ih hriamhreipi 25 an kah ruangah inn pawl a siat ih, khawsung mipi hriamhma an ngah hleiah inn 5 a kang.
Cuihleiah mipi fehnak lamzin ah bomb 7 an kammi cu KNU in an simsial thei ih, mipi lam ih bomb 4 an pal ruangah hriamhma ngahtu an um tiah an sim.
KNU le BGF doawknak ah BGF mi 2 cu hriamhrei thlah in KNU ah an ap aw ih, KNU lam cun BGF hriamhma 4 an laksak ngah. KNU le BGF karlak doawknak ah BGF mi 4 hriamhma an ngah.
Thlakhat sung doawknak ah ralkap lam cun mipi thilri le vulhzuat pawl tampi an long tiah KNU ih casuahmi ah an tarlang.
2021 March 27 ihsin ralkap le BGF cu KNU uknak ram ah ram an nor, doawknak lam an cangvai, hmunkhuar in sakhan an ret ruangah nitinten doawknak a suak. Hi doawknak ruangah mipi 20000 lenglo cu mai khua le ram hlum ngam loin hmunhimnak hawlin an vakvai tiah theih a si.
