Dinhmun leh khawsak harsa tak karah pawh theihtawp a bei tlat tu te chuan a tawp ah hlawhtlinna an chang thin.
Madhya Pradesh’s Indore a mi thlai (vegetable) zuar a ei zawng thin fanu kum 29 a upa Ankita Nagar chu Civil Judge ah a tling tih hriat ani.
Ankita Nagar hi Judge dinhmun in hlangkai tur hian awlsam te in hlawhtlinna a hmu bik lo a. Recruitment exam hi vawi thum a hlawhchham hnu ah vawi 4 na ah chiah a tling ani. News agency PTI te hnen ah chuan vawi 3 a hlawhchham hnu khan beidawnna leh rilru hnualna a nei hran lo a, a tum a sawh sawn phah reng reng loh thu a sawi.
“Vawi 4 ka beih hnu a civil judge Class-II examination ka paltlang vang hian ka hlim hle a, ka lawmzia hi thu mai ringawt chuan ka puangchhuak zo lo” tiin a sawi hial
Nagar pa Ashok Nagar hian Musakhedi area ah thlai zuar in sum a thawkchhuak thin a, a pa hi an chhungkaw chawm tu ber ah a tang. Nagar chuan exam na tura a inbuatsaih zawh hnu ah te a pa thil zawrhna ah hian a puih thin thu a sawi bawk.
Masters degree (LLM) a nei a, Law a bachelor’s degree neih tum a beiin judge dinhmun a inhlang turin thutlukna a siam ta ani.”Vawi thum lai ka hlawhchham a, mahse ka bansan phah lo. Ka hlawhchham na chuan ka tum ram thleng turin min pui zawk. Heng harsatna te hian hmalam pan zel turin kawng min hawn sak ani” a ti.
Ankita Nagar chuan tu te tan tan pawh thlei bik neilo leh dik tak a rorel a tum tih a sawi a, a pa Ashok Nagar chuan a fanu in harsatna tam tak hmachhawn chunga a huaisenna a hloh lo chu a chhuang hle a, midang te tan entawn tlak a nih zia a sawi ve hial reng bawk.
