Ni 4 sung Kani pengih PDF le Kawl ralkap doawknak ah Kawl ralkap 50 hnakih tam an thi.
Sagain ramṭhen Kani pengsung ah May 22 ihsin 25 tiang Ni 4 sung, Kawl ralkap le Kani PDF pawl doawknak ah Kani PDF lam ihsin mi 11 in ram le miphun hrang an nunnak a liam, Kawl ralkap suamhmang lam ihsin mi 50 hnakih tam an thi. Kani PDF lam ihsin nunnak liamtu mi 11 pawl lakah mi 9 cu zo an si timi theihfiang an si zo nan, mi 2 cu an ruak a siat thluh ruangah zo an si timi kan theifiang hrih lo, tiin Kani PDF cun an sim.
May 22 sun ah khan Kawl ralkap mipum 70 hrawng မျှိုင်း khaw lam pan ih an rat lai ah Kani PDF pawl in khawsung luhzawng ah Bomb an rak kam cia in an rak bawhthup i, hmun le hmun ah an rak kah ciamco. Kawl ralkap mi 50 hrawng an thi, mi 15 hrawng nungdam in an tang tiah PDF lam cun an sim.
Khawsung mi khal hriamhma tuar le nunnak liam an um, hipawl hi Kawl ralkap pawlin hriamhreipi khawpi ih an kah ruangah a si. Kawl ralkap pawlin khawsung ah ṭanhmun khuar in an umcilh. Khawsung mi pahnih kawl ralkap pawlin an kap that, tiin an rel.
Sagain ramṭhen, Kani peng ah hin April 2 zan ihsi khan May 26 tiang a khat tawk, khat tawkah khawsung mipi humhimtu le Kawl ralkap pawl an kap aw ringring. Mipi humhimtu pawl cun hriamhrei ṭha an nei loih Lai meithal te thaw lawngin an rak do. Thla 2 zikte an doawknak ah Kani mipi humhimtu (Kani PDF) lam ihsin mi 50 hnakih tam ram le miphun hrang an nunnak a liam, Kawl ralkap pawl khal mi 300 hnakin tam an thi, tiin Kani PDF sungtel pawl cun an rel.