Myanmar ram sungah February 1 ihsin tuini tiang thlahra sungah meithal 6000 lenglo kaihngah a si tiah ralkap council thusimtu General Zaw Min Htun in November 26 ih Naypyitaw ah tuahmi thuthangca simfiangnak hmun ah simnak a nei.
February 1 – November 23 tiang tuahcop meithal, lai meithal, ဘောပင် meithal telin meithal 6087 kaihngah a siih, cetzung tuahmi meithal thar pawl, ramleng ihsin thunlutmi meithal pawl khal an tel tiah a sim. Atui kaihngah tuahcop meithal, lai meithal, ဘောပင် meithal tel loin meithal dang 1412 an tel tiah a sim bet.
Kaihngahmi lakah cerek phunkim 15000, tuahcop bomb phunkim 3000 lenglo, kutden bomb phunkim 2459 an tel ih nasazet ih puak theimi pawl khal an tel tiah a sim.
2020 rampi hrilawknak ah dik lonak a um timi puhmawh in February 1 ah ralkap in rampi thuneihnak an lak hnu mipi pawl cun ralkap thuneihnak dokalh in duhphorhnak an tuah ih lamzawhnak an rak nei.
Ralkap thuneihnak dokalh ih duhphorhnak tuahtu mipi pawl cu ralkap le palik pawlin meithal thawn an țhekdarh hnu Sagaing, Chin, Karenni ram telin Myanmar ram sung hmunkip ah ralkap council cu mai neihmi hriamhrei cio kai tahratin dothlennak tuah caan a rak suak.
