Peru a nu pakhat chu vui tura kuang a an dah fel vek tawh hnu ah alo nung leh a, mahse a nunna chhan hman a ni ta lo.
Kar liam ta mai a thil thleng a ni a, Peru a Lambayque ah a ni. He hmeichhia Rosa Isabel Cespedes Callaca tia tarlan hi car chetsualna rapthlak tak a tawk a, chetsualna ah hian a hliam a nat em vangin a nunna chhan hman nilovin Medical lam ten a thi tih an puang.
Thawhlehni ah a vuina hi neih a ni a, kuang chhung ah dah a phum tura a thenrual leh chhung ten a kuang an zawn mek lai chuan kuang chhung atang hian thawm a rawn siam tih an sawi.
Kuang an zawn chhung a thawm ri a awm avang chuan an han hawng a, an vui tur mitthi a an ngaih tawh Rosa Isabel Cespedes Callaca chu nungdam in chau taka a mit a rawn meng chu an hmu ta ani.
Cemetery caretaker Juan Segundo Cajo in a sawidan in Rosa hi a mit meng a chau hle a, a thlan in a bual bawk ani. A office ah rang taka tlan lut nghal in Police te hnen ah thil thlen dan chu a hrilh a, kuang chhung a awm mek Rosa chu Referential Hospital Ferrenafe ah hmanhmawh taka hruai ani.
Medical lam chuan lo en in, ala dam ngei tih an sawi a, life support machine vuah in a dinhmun chuan ziaawm lam a pan zel dawn emaw tih laiin a nunna chhan theih a nih loh thu damdawiin hruai thlen hnu lawk ah an puang leh.
Rosa chhungte chuan a tira en hmasa tu medics te hian an buaipui lai khan nikhawhrelo in a awm ang a, hei vang hian a thi ang a puan a nih an ring. He thil thleng chungchang ah hian a tira a thih thu puang tu Hospital te lakah investigation neih mek ani.
Car chetsualna ah hian Rosa hian mi 4 a chuanpui a, an zing a pakhat pawh in a nunna hi chanin midang 3 ten hliam na tak an tuar bawk.
