Chin ramkulh saklam Tedim peng Aklui khua ah kum 27 ih upa nunau pakhat cu ralkap 3 in November 12 zaan ah an sualpi tiah a sungkua pawlin an sim.
Aklui khua cu Tedim – Kalay lamzin ih khua pakhat a siih, ralkap pawl cu Aklui khua ah October 30 ihsin November 13 tiang hmun an khuar tiah theih a si.
“A pasal cu meithal thawn an tin hnuah dai buainak room ah ah hruai, a Lu an thawi, a kiangih ummi pakan (ကြွေပန်းကန်) pawlin an Lu an thawi, a Lu tung lo dingin pakhat in a kil, pakhat ih an nu cu a hmai ah a sualpi, an pathum in zaan suimilam 11:00 ah țumkhat an sualpi, zaan suimilam 12:00 ah mi pahnih an ra sal ih hmaisa an tuah vekin an tuah lala” tiah tualsungmi pawlin an sim.
Ralkap pawlih sualpimi cu thlakhat ih upa naute neimi a si timi khal an sim. Cuihleiah ralkap 3 cun an sualpi thluh hnuah a țhi le a hnakhaih pawl khal an laksak tiah an sim bet. Sualpi tongtu cu nauhak unau 3 ih Nu a si tiah theih a si.
Atui thilcangmi cu Chin miphun zaten hmuhsuamnak a si hleiah kan Chin nunau pawl hmuhsuamtu ralkap council thiltuahmi cu nasazet in kan dem ih doawknak ah nunau pawl hmuitin ih hmunsuamnak a tuahtu mi sualpitu ralkap thiltuahmi cu phuba kan la ding tiah CDM Siyin (CDF – KKG battallion 2) cun thuthannak an nei.
Ralkap pawlih sualpi a tongtu innsang cu hmunhimnak hmun an thleng zo tiah theih a si. Hi thuhla kimcang thei dingin CHRO khalin an zinzoi rero thu Salai Za Uk Ling in simnak a nei.
November 7 sun khalah Shan ramkulh saklam Kutkai peng Namphalun khua ih hmuan kiltu kum 62 ih upa Kachin nunau cu Phekhung khawpi ralkap battallion 336 ih ralkap Min Min Soe in a sualpi tiah ralkap council cun November 11 ah thuthannak an nei.
Ralkap council cun kum 62 ih upa nunau sualpitu cu a phuansuah aw zo ruangah ralkap dan hleiah mipi lam daan thawn thubuai kan tuahsak ding tiah an sim.
Cuvek thotho in June 10 khalah ralkap pakhat in Kutkai peng Namphaka ih kum 14 ih upa phungki nauhak nute pakhat cu a rak sualpi ih tuini tiang thuhla pakhat hman ralkap council in simfiangnak an tuah lo.
