Chin ramkulh saklam Tedim khawpi lam ih fehtu ralkap motor 5 cu Dimlo le Sozang khua karlak ah September 24 zaan nazi 6:30 hrawngah cun bomb thawn an rak do ih ralkap motor 2 a siat tiah theih a si.
Hi thilthlennak hmun cu Sozang khua kiang a si. Kalay ihsin Tedim fehnak lamzin tluan ih khua pakhat a si.
PDF-Zoland, Civil Defense Militia (CDM) ralkap lam ih țuanvo neitu pakhat in “nazi hrek tluk kahawknak a um, ralkap motor 2 kan kap ngah ih pakhat cu a siat nasa, ralkap lam hi a malbik mi 6 an thi, hriamhma ngahtu khal an tam tiah kiangkap um pawlin an rel, kanmah lam ah hriamhma ngahtu um lo ten tluang zetin dung kan kirsal thei” tiah simnak a nei.
September 24 zinglam nazi 10:00 hrawng ihsin Falam – Kalay lamzin Tedim khawpi pialnak Taingen khua ah ralkap motor 5 an cawl ih, khawthim zawngah Tedim khawpi lam pan ih an feh rero laifang ah kah an tong tiah theih a si.
September 17 zinglam nazi 5:00 khalah Tedim peng Kaikam khawpi ih palik gate cu CDF (KKG), Civil Defense Militia (CDM), PDF – Zoland cun an rak kap ih ralkap council hriamkai mi 5 an rak thi.
Ref : ZSN, Zalen, Mizzima
