Mon ramkulh Tațhung peng Nawngbo le Mayangone khua karlak ih Gas pipeline pakhat cu November 11 zaanlam suimilam 6:30 hrawngah bomb thawn an puah tiah tualsungmi pawlin an sim.
Hi Gas pipeline cu zo timi theih lo mi burkhat in bomb kam in an puaktermi a siih minung hriamhma ngahtu an um lo tiah an sim.
Tualsungmi pawlih simnak vek asile hi gas pipeline hi Dawai ihsin Yangon ih hruaimi Pipeline pakhat a siih, bomb thawn an siatsuah hnu zaan suimilam 10:00 hrawngah Gas zunmi pawl a cawl tiah an sim.
Ralkap neihmi Gas pipeline siatsuahmi cu an tuahmi a si tiah Tațhung PDF cun thusuahnak an nei. Hi gas pipeline siatsuahtu cu KNLA le Tațhung PDF țangtlang ih tuahmi a si tiah thusuahmi ahcun an tarlang.
Tațhung PDF cun November 6 khalah Tațhung le Belin Kamaseng veng kiangah ralkap pawl motor cu bomb thawn an rak do dah zo. Bomb thawn an donak ruangah ralkap 3 an thi ih mi 4 in hriamhma a ngah tiah Tațhung PDF cun thusuahnak a nei.
