Sagaing ramțhen Tamu khawpi ah tuizing August 23 doawknak ah ralkap 17 an thi ih PDF sungtel 1 a thi ve tiah Tamu – PDF țuanvo neitu pakhat in simnak a nei.
Tamu khawpawn Industrial Technological University ih hmunkhurtu ralkap pawl cu August 23 zinglam nazi 5:00 hrawngah PDF – Tamu cun luhcilh in an kap ih doawknak nasazet a thleng.
“Tuizing naxi 9:00 tiang kan kap aw, ralkap lam hi an thi rori, Tamu siizung ah ralkap an hnok luihlo” tiah PDF Tamu țuanvo neitu pakhat in a sim.
August 22 khalah Tamu myoma veng 12-nak ih nanphalung phunra tlawng ih hmunkhuartu ralkap pawl cu PDF Tamu cun bomb thawn an rak do ih ralkap 2 an thih hleiah ralkap hrekkhat hriamhma an ngah.
Tamu PDF cu NUG kuthnuai ih PDF a siih, ralkap pawl le an lam țangtu pawl cu lamzin phunkim in thianfainak kan tuah vivo ding tiah PDF Tamu cun ralrinnak thu an suah.
Sagaing ramțhen Tamu khawpi cu ralkap do ih hriamhreikai hmaisabiktu lakah pakhat a si. Tamu khawpi ahhin April thla sungah doawknak țumkhat ah ralkap 18 an rak thi dah zo.
