Hmangaihna hian ramri a kham lo a ni tih entir nan tun hnai khan Sweden hmeichhe pakhat Christen Liebert chuan online-a a tawn mipa nen innei turin India ramah a zin vang vang mai. He Swedish hmeichhia hian a thinlung in hmun hla taka a hmangaih em em nei tur hian kilometre 6,000 chuang a hla a zin a ni.
Christen Liebert hian India rama a zin hma a Facebook-a a lo tawn tawh, Etah, Uttar Pradesh-a cheng Pawan Kumar chu damchhung a pasal ni turin a nei a ni.
News agency, ANI in a tarlan danin an nupa hian Zirtawpni liam ta khan Hindu dan angin inneihna hi an buatsaih a, Christen pawh in Hindu val a thlan takah chuan India inneihna thuam inbel chungin inneih hunserh ah hian a inlan.
Kum 2012 khan Facebook ah Pawan Kumar nen hian an intawng a, Christen hian India ramah a kal tawh tih a sawi bawk. “India ramah hian ka lo kal tawh a, India hi ka hmangaih a, he inneihna hi ka lawm hle a ni” a ti.
Mo neitu Pawan Kumar pa Geetam Singh chuan an hlimna chu naupangte hlimnaah a innghat tih a sawi. A fapa in ram dang mi nupui atan a nei hi a lawmpui a, “he inneihna hi kan pawm vek a ni” tiin a sawi.
Hmangaihna vanga hmun hla tak atanga zin vang vang hi hriat tur an awm ve fo a, kar hmasa mai pawh khan Pakistan aṭanga lo kal hmeichhe pakhat kum 19 mi chu Uttar Pradesh a cheng pasal atana neih tum a dan loa India ram a lut nia ringhlel in Bengaluru-ah man a ni bawk.
