Sagaing ramțhen Debeyin Tharyaraye khua ah November 23 ahcun naupai nunau pakhat telin sungkha pakhat minung 5 thah an tonnak thuhla ah PDF ih tuahmi a si tiah ralkap council thusuahmi cu a dik lo tiah PDF cun an sim. Ralkap council cun ram pumhuap ih thilthlengmi buainak pawl cu PDF ih tuahmi an si ti tahratin mipi le PDF karlak ah zum sual-awknak suak dingin an tuah tiah Debeyin Galon PDF sungtel pakhat in simnak a nei.
“Atui thuhla cu PDF thawn pehtlaih awknak a nei lo, suam hmang thiltuah pianhmang a si, thilri pawl khal an laksak, ralkap council cun rampi huap ih buainak pawl cu PDF pawlin an tuah ti tahratin mipi le PDF karlak ah zum suak-awknak suak dingin an tuah, tualsung pawlkom khalin hi thuhla cu kan zingzoi rero” tiah Galon PDF sungtel pakhat in a sim.
Sagaing ramțhen sungih PDF pawl cu anmai lungput nei lotu, NLD sungtel pawl le sumpai bawmtu pawl cu an that tiah ralkap council cun November 25 ah thuthannak an nei.
Hi thah tongtu sungkua minung 5 cu November 23 zinglam suimilam 3:00 hrawngah an that ih tangka ting 100 hrawng khal an laksak tiah tualsungmi pawlin an sim.
