Myanmar ram rak uktu ralbawi hlun Senior General Than Shwe le a nupi Daw Kyaing Kyaing cu Naypyitaw khawpi ralkap siizungpi ihkhun 1000 ah dam loin an tuamhlawm aw rero tiah theih a si.
An pahnih in besezet an si loih Covid – 19 nathrik khal an cekfel bet ding tiah ralbawi pakhat in tuini August 11 ah simnak a nei.
August 10 zaanlam ah siizung an luh thuhla a darh ih Senior General Than Shwe cu a thi timi khal thuthang ah a rak darh ciamco.
Kum 88 a simi Senior General Than Shwe cu a harhdamnak lam a ngaihsak aw ih zu in minung khal a si lo tiah a kuthnuai pawlin an sim.
Senior General Than Shwe cu 2011 ihsin a hnațuan a cawlh hnu kum 10 sungah mipi ih hmuh mal zetmi a si.
2015 rampi hrilawknak ah NLD ih nehnak a co tikah Daw Aung San Suu Kyi, U Thura Shwe Mann pawl thawn tonawknak an nei.
China Communist Party central committee ih International Information minister Mr. Song Thawng ih 2016 Myanmar a ra tlawn țum ah Naypyitaw ah an tong aw ih hminsinnak tla an zuk tlang.
Cuihleiah 2019 June thla ah a makpa ralbawi pension Major General Thein Naing ih thihni ah thlanmual ah a feh.
Ralkap ihsin a hnațuan a cawlh hnu midang hmuh theih ih a tlanlen hi a tam lo ngaingai.
