Sagaing ramțhen Shwebo district sungih khawtin cil ciamco in mawhnak neilo tualsungmi that ih, mi thilri long le inn pawl urkangtu ralkap pawl cu tualsung hriamkai pawlin mizansun February 10 ah Shwebo district Khinoo peng ah bomb in an do ih ralkap 20 hrawng an thi tiah Shwebo Defense Force (SBDF) cun thuthannak an nei.
Mizansun February 10 sundir nazi 12:30 hrawngah Shwebo le Myitkyina karlak zinpi Yioo lam ihsin Khinoo lam pan ih fehmi ralkap motor 4 cu Khinoo lamzin tonawknak kiangah Shwebo Defense Force (SBDF) battallion (3) ih bomb lam țuanvo neitu pawl cun ပဒေသာ bomb 7 hmangin an rak do tiah theih a si.
“Hi doawknak ah ralkap motor 2 cu lakawk ṭha nawnlo khawp in an siat thluh ih ralkap 20 hrawng an thi” tiah SBDF cun thuthannak ah an tarlang. Ralkap pawl cu bomb thawn do an ton hnuah kiangkap an kap ciamco ih an kiang naite ih ummi fangcang ko pen khawmmi pawl khal an urkang ciamco tiah an sim.
Hi doawknak ah tualsung hriamkai lam ihsin zohman hriamhma ngahtu um lo ten dung an sipsal thei tiah SBDF ih thuthannak vekin theih a si.