Shan ramkulh nisuahnak saklam hmunram ih ralkap le MNDAA doawknak ah MNDAA cun cerek ting 2 hrawng le RPG cerek 5300 lenglo telin hriamhrei thilri tam zet an hmang tiah ralkap council cun simnak an nei.
October le November ahhin Shan ramkulh saklam ah MNDAA le ralkap karlak doawknak a um ring thu November 26 ih Naypyitaw ah tuahmi ralkap council thuthangca simfiangnak khalah General Zaw Min Htun cun a rak sim.
Thil danglam zet a simi cu MNDAA thawn doawknak a um tinten cerek hmannak, hriamhrei thilri hmannak pawl tuihlan hnakin a tam zet timi hmuh a si thu, thuhla kan theih dan vek asile cerek 260000, RPG cerek 5300 leng, 107mm cerek 40 lenglo an kap timi hmuh a si thu, hi vekih cerek le hriamhrei thilri tam zet an hman theinak hi rinhmai um ngaingai a siih, an ngahnak hrampi pawl hawlsuah a țul thu ralkap council thusimtu General Zaw Min Htun in simnak a nei.
Ralkap pawl cu Shan ramkulh saklam Mungku hmunram ah cat loin thazang an bet rero ih Thanlwin tipi nitlaknak lam tluan ah MNDAA thawn nasazet in doawknak a um.
Muse distric Pansaing le Mungku, Phawngseng hmunram pawlih MNDAA sakhan pawl cu April thla ihsin ralkap pawl cun raldonak tank telin ralkap tam zet thawn doawknak an tuah ruangah caan reipi sung doawknak a suak.
Doawknak ahhin ralkap lam ihsin battallion hotu le 2IC telin ralbawi le ralkap tam zet hriamhma ngah in an thi ih MNDAA ih vui sak ding tiang ralkap tam zet an thi tiah The Kokang Media cun a tarlang.
Cuihleiah ralkap pawlih tansanmi hriamhrei thilri tam zet khal MNDAA cun tuletu an laksak ngah ringring tiah theih a si.
